Коалицијата на радикалната левица Сириза победи на вчерашните парламентарни избори во Грција со освоени 35,46 проценти од гласовите, покажуваат податоците од обработката на 100 отсто од гласачките ливчиња.
Со дополнителните 50 пратенички места што ги добива првопласираната партија, Сириза ќе има 145 места во парламентот.
Конзервативната Нова демократија доби 28,09 отсто од гласовите (75 места во парламентот). На трето место е неофашистичката Златна зора со 6,99 проценти (18 места), по неа се ПАСОК и ДИМАР со 6,28 проценти (17 места), Комунистичката партија на Грција - 5,55 проценти (15 места), Потами - 4,09 проценти (11 места) и Унијата на центристите - 3,44 проценти (девет места).
Независни Грци, партијата која повторно ќе биде коалициски партнер во владата, освои 3,69 проценти од гласовите и доби 10 места во парламентот. Двете партии ќе имаат вкупно 155 пратенички мандати, што ќе им обезбеди мнозинство.