Карамарко и Мост немаат мнозинство во парламентот

Загреб, 24 ноември 2015 (МИА) - Откако поранешниот член на Мост, Драго Прогомет ja формираше новата партија  „ХРИД“ и со себе зеде уште двајца пратеници, ситуацијата дополнително се искомпликува за лидерот на Хрватската демократска заедница (ХДЗ) Томислав Карамарко, кој и со Мост го губи мнозинството, а за да го надомести тоа мора да придобие некои помали партии. 

59-те мандати на „ХДЗ“, колку што освои со коалициските партнери, и 16-те мандати на „Мост“ вкупно се 75 мандати, а за мнозинство во парламентот потребен е еден мандат повеќе, односно 76, пренесува Танјуг.

За ситуацијата да биде уште полоша за Карамарко, еден од пратениците на „Мост“, Стипе Петрина кој „ХДЗ“ ги нарече четници и нацисти, наведе  дека со нив нема да коалицира по ниту една цена, бидејќи „желудникот не му дозволува соработка со такви“

Освен него, како што јави хрватски Индекс, се шират гласини дека „Мост“  наскоро можеби ќе го напуштат уште два члена.