Атина, 5 февруари 2016 (МИА) - Пратеничката на грчката опозициска Нова демократија и поранешна министерка за надворешни работи Дора Бакојани испрати прашање до шефот на грчката дипломатија Никос Коѕиас во врска со „помошта на Европската комисија за зајакнување на македонската граница со цел намалување на приливот на бегалци кон Европа“.
Како што јави дописникот на МИА од Атина, Бакојани во писменото прашање до Коѕиас се повикува на „извештаи“ од Брисел според кои „Европската комисија ќе ја зајакнува инфраструктурата на македонската граница за да се забави приливот на бегалци во Централна и Северна Европа“.
- Планот се однесува на изградба на соодветни објекти на територијата на Македонија, далеку од грчката граница. За реализација на конкретните проекти, се промовира идеја за користење на фондови на Генералниот директорат за проширување на Европската комисија, пишува Бакојани и прашува дали грчката Влада знае за овие планови и кои чекори ќе ги преземе официјална Атина за да се зачува позицијата на Грција во Шенген зоната.
Според Бакојани, која е одоговорна за надворешна политика во Нова демократија „ако сето ова се случи, тоа ќе значи дека држава која не е членка на ЕУ ќе има привилегиран третман и ќе биде потег без преседан кон Грција... кој драматично ќе ја деградира позицијата на Грција во рамките на Шенген зоната“.