Екс-гувернерот на албанската Централна банка го тужи Парламентот

Тирана, 11 февруари 2016 (МИА) - Поранешниот гувернер на Централна банка на Албанија, Адријан Фулани поднесе тужба против албанскиот Парламент и против институцијата со која раководеше, поради, како што тврди, неговото „неправедно разрешување од функцијата“.

Како што јави дописникот на МИА, поранешниот гувернер на централната банка тужбата ја доставил до Управниот суд на Албанија.

- Не барам компензација за времето кое неправедно го минав во затвор. Тужбата ја поднесувам поради неправедното разрешување од функцијата гувернер на Централна банка на Албанија, изјави Фулани.

Фулани беше уапсен на 5 септември 2014 година под обвинение за злоупотреба на службената положба. Апсењето следеше пет недели откако вработен во Банката призна дека од трезорот украл 713 милиони леки (6,6 милиони долари) во банкноти повлечени од оптек.

Откако првично беше притворен, на Фулани по десет дена му беше изрешена мерка домашен притвор.

Тој уште од самиот почеток ги отфрлаше обвинувањата, а неговиот адвокат обвини дека станува збор за политички мотивиран процес.

По две судски рочишта во период од два месеца Основниот суд во Тирана го прогласи Фулани за невин, а ваквата прсуда на 23 декември минатата година ја потврди и Апелацискиот суд.