Лондон, 27 април 2016 (МИА) - Во најновиот извештај на „Фридом хаус“ за слободата на медиумите забележан е голем пад на медиумските слободи во земјите од регионот на Балканот.
На листата која опфаќа 199 земји во светот, Македонија се наоѓа на 136-то место, што претставува пад од четири места. Според извештајот на „Фридом хаус“, таа од групата на делумно слободни земји паднала во групата на неслободни земји.
Македонија е една од земјите кои минатата година имала најголем пад, а меѓу нив се наоѓаат Турција, Бангладеш, Бурунди, Франција, Србија, Јемен, Египет и Зимбабве.
Хрватска се наоѓа на 84. место, Црна Гора (80), Србија (87), Босна и Херцеговина (104), Албанија (106), Бугарија (78) и Косово, кое е посебно рангирано, на 96-то место.
Во целост, состојбата во врска со слободата на медиумите во светот минатата година била на најниско ниво во последните 12 години, а речиси половина од светското население живее во земјите во кои нема слободни медиуми, соопшти „Фридом хаус“. Оценката на оваа организација е дека Европа во изминатите 10 години забележала поголем пад во слободата на медиумите од било кој друг регион.
Од 199 земји и територии кои се разгледувани во 2015 година, вкупно 62 се проценети како слободни земји, 71 се рангирани како делумно слободни, а 66 нанко неслободни, се наведува во документот на „Фридом хаус“.
Насилството и бегалската криза биле главни вести во Европа минатата година, но исто така влијаеле на известувањето за случувањата, пишува во извештајот.
Медиумите се најслободни во Норвешка, Белгија, Финска, Холандија и Шведска, а меѓу последните земји и територии на листата се наоѓаат Северна Кореја, Белорусија, Крим, Иран, Сирија и Куба.