Коцијанчиќ: Турција треба да ги почитува демократските стандарди на ЕУ, па и слободата на медиумитеБрисел, 21 февруари 2017 (МИА) - Турција како земја кандидат за членство во ЕУ треба да ги почитува демократските стандарди на заедницата, вклучувајќи ја и слободата на медиумите, изјави денеска портпаролката на Европската комисија, Маја Коцијанчиќ, коментирајќи го приведувањето на дописникот на германскиот весник „Велт“во Анкара, јави ТАСС. - Ние внимателно ќе го следиме развојот на случајот и на другите предмети на приведување новинари во Турција. Ние повеќепати сме повторувале дека Турција треба да ги почитува највисоките демократски стандарди на ЕУ, вклучувајќи ја и слободата на медиумите, која е појдовна основа на секое демократско општество, посочи портпаролката. Во електронското издание на весникот „Велт“ претходно се појави информација дека дописникот на весникот е приведен од турската полиција под сомнение за учество во терористичка организација, неправилно користење на податоци и терористичка пропаганда. Според податоците на весникот, 43-годишниот репортер Дениз Јуџел, кој има германско и турско државјанство, претходно бил баран во врска со расветлување на случајот со хакерските напади на електронската пошта на турскиот министер за енергетика и природни ресурси, Берат Албајрак. Весникот прецизира дека на 14 февруари новинарот бил распрашан во полициската управа во Истанбул и дека бил претресен и неговиот дом. Американските медиуми пренесуваат дека германското Министерство за надворешни работи изрази надеж дека предметот ќе биде разгледан „во согласност со владеењето на законот“. Германското МНР се надева и на праведен однос со „почитување на слободата на печатот, гарантирана од турскиот Устав“. Главниот уредник на „Велт“ ја истакна одличната работа на Дениз Јуџел и убеден е дека „праведната судска истрага ќе доведе до утврдување на неговата невиност “.
|