Косово без одлука за аплицирање за членство во УНЕСКО

Приштина, 23 февруари 2017 (МИА) - Косовскиот заменик министер за надворешни работи Ваљон Муртезај изјави дека се уште не е донесена конечна одлука за тоа кога Косово ќе аплицира за членство во УНЕСКО.
Муртезај истакна дека косовските институции, пред се Министерството за надворешни работи, интензивно работат на унапредување на досиејата за аплицирање, во однос на минатиот пат, додавајќи дека конечната одлука за тајминг на барањето се уште нема.
Според него, „многу околности треба да се анализираат, случувањата внатре во УНЕСКО, како и на Косово и во регионот, а се тоа влијае врз процесот“.
- Треба да бидеме внимателни да не се случи истата ситуација во која нема да успееме. Во случај да се аплицира вторпат, мора да имаме сигурни шанси дека ќе станеме членка, нагласи заменик шефот на косовската дипломатија.