Белград, 30 март 2017 (МИА) - Претседателскиот кандидат за изборите во Србија, Саша Јанковиќ, во интервју за ТАСС изјави дека не ја признава независноста на Косово, но смета дека тоа фактички е независно.
- За мене Косово, со неговите специфични особености, е дел од Србија, но фактички тоа е независно. Јас, меѓутоа, се надевам дека ќе се изгради таква Србија од која луѓето нема да сакаат да бегаат. Тоа може да се случи по 10, 20, 40 години, не утре, но јас не сакам Србија да ја лишувам од можноста да си го поврати Косово, изјави Јанковиќ.
Тој, истовремено, изјави дека не е подготвен да војува за Косово, туку смета дека секој чекор што Србија го презема е таму да ја подобрува ситуацијата и да ги спречува конфликтите.
Јанковиќ (46) во текот на последните 10 години беше омбудсман, но поднесе оставка за да може да учествува на претседателските избори како кандидат на граѓанската иницијатива „Србија без страв“.
Според истражувањето на агенцијата „Ипсос“, од 11-те претседателски кандидати најголеми шанси за победа на избори има премиерот Александар Вучиќ, кој уште во првиот круг може да собере над 50 проценти од гласовите, а на второ место е Јанковиќ со 14 проценти.