Истанбул, 27 јули 2017 (МИА) - Во невремето проследено со силен дожд, што денеска попладне го зафати Истанбул, повредени се најмалку две лица, а водата на улиците доведе до прекин на градскиот сообраќај и откажување летови на аеродромот.
Надојдената вода по улиците однесе многу возила, а граѓаните останаа заглавени, обидувајќи се во „шпицот“ да се вратат од работа во своите домови.
Летовите на Меѓународниот аеродром Ататурк се откажани, а не работи ниту метрото во овој турски мегаполис.
Во пристаништето Хајдарпаша се преврте голем кран, што доведе до експлозија и пожар, кој веднаш беше изгаснат.
Во делови на Истанбул и трамвајскиот превоз е во прекин.
Две лица се повредени кога на улица полна со минувачи падна ѕид од стари гробишта.
Градските власти превентивно го затворија тунелот Евроазија, кој ја поврзува азиската и европската страна на Истанбул под Босфор.