Приштина, 9 август 2017 (МИА) - Претставниците на партијата „Листа Српска“ има неколку услови, чие исполнување е пресудно за нивно учество во новата косовска влада или во краен случај да дадат поддршка на која било коалициска влада.
Пренесувајќи ја веста, електронското издание на приштинскиот весник „Експрес“ констатира дека „претставниците на српскиот политички субјект го зголемија пазарот за да бидат дел или да ја поддржат владината коалиција“.
- Формирањето на Заедницата на српски општини, поголема застапеност на Србите во институциите, формирање нови општини со мнозинско српско население, како и гаранција дека без српските претставници нема да се задира во имотот кој ним им следува, се само дел од барањата на Листа српска, наведува весникот, констатирајќи дека тоа се „црвените линии“ кои денеска јавно ги соопштила партијата.
Партијата исто така го потврдила учеството на утрешното продолжение на конституивната седница на косовскиот парламент.
Нејзин претставник претходно изјави дека партијата ќе го поддржи Кадри Весели, лидерот на Демократската партија на Косово за претседател на парламентот, но оти за владата ќе ги разгледа најпрво интересите на Србите на Косово.