Судскиот совет на Хашкиот трибунал денеска го осуди командантот на силите на босанските Срби, генерал Ратко Младиќ на казна доживотен затвор.
Станува збор за првостепена пресуда, на која жалба ќе може да поднесат и Хашкото обвинителство и одбраната на Младиќ.
Младиќ е осуден за геноцид во Сребреница, прогон на муслимани и Хрвати ширум Босна и Херцеговина, тероризирање на жителите на Сараево и киднапирање на припадници на Мисијата на Обединети нации - Сини шлемови и низа други злосторства. Тој не е виновен за геноцид во седум општини во БиХ.
За време на изрекувањето на пресудата на Младиќ му се слоши, при што беше дозволена пауза од пет минути, но се пролонгира бидејќи му се пружаше лекарска помош. По враќањето тој беше отстранет од судница бидејќи извика дека „се е лага“.
Со пресудата за Младиќ, Хашкиот трибунал завршува со работата.
Меѓународен суд за воени злосторства во поранешна Југославија по 24 години од формирањето ќе престане со работа на 30 ноември, додека постапките по жалбите, ревизиите и извршувањето на казни во негово име во иднина ќе го врши Механизмот за кривични судови со седиште во Хаг.