Српскиот претседател Александар Вучиќ предлагаше размена на територии со Косово, но тоа го отфрлија од меѓународната заедница која не му предложи ништо друго освен правно-обврзувачки договор со кој Косово ќе добие место во ОН, изјави поранешниот српски министер за надворешни работи Вук Јеремиќ на седница на својата партија.
Јеремиќ отфрли критики од Вучиќ дека „клучните грешки за Косово се направени пред 10 години„. Тој додаде дека најголемите грешки се во 1998 и 1999 година поради тогашната политика „на сегашното лидерство на државата по што следуваше бомбардирање од НАТО и повлекување на српската држава од Косово“.
Јеремиќ дополни дека Србија исполнила се од Бриселскиот договор, а во замена добиле само „ветувања за една доста слаба асоцијација – Заедница на српски општини, и дури и тоа не е исполнето“, објавуваат денеска српските весници.
– По поразот на дипломатијата во Белград, следува состојба да го дадеме и последното – место на Косово во ОН. И сега на преговарачка маса е поставено тоа преку договор за целосна нормализација на односите Белград – Приштина, наведе Јеремиќ.