Приштина го потсетува Вучиќ дека 1 720 дена не го исполнил договорот што го потпишал

Шефот на косовскиот тим за преговори со Србија, Авни Арифи, денеска потсети на договорот кој во Брисел беше потпишан пред помалку од пет години, а кој се однесува на електричната енергија, јавува дописникот на МИА од Приштина.

По зачестените изјави на српскиот претседател Александар Вучиќ дека Приштина не ги почитува договорите од преговорите со посредство на Брисел, Арифи потсети дека на 8 септември 2013 година е потпишан договорот кој до ден денес Белград не го испочитувал.

- Да го потсетиме српскиот претседател дека тоа значи оти пред 1 720 дена српската држава потпиша договор, но имплементацијата никогаш не започна. Трогателни зборовите на г-дин Вучиќ за довербата, напиша Арифи.

Српскиот претседател Вучиќ, во последно време често дава изјави дека само Белград ги исполнува обврските преземени со бриселските договори, додека Приштина своите обврски не ги исполнува, а „меѓународната заедница тоа го толерира“. Ваквите чести изјави на Вучиќ, многумина ги поврзуваат со оддолжувањето на процесот на формирање на Заедницата на српски општини во Косово.