Српскиот премиер Воислав Коштуница во обраќањето до нацијата го осуди денешното едногласно прогласување на независноста на Косово, нарекувајќи го „лажна држава“.
- Денеска незаконски беше прогласена лажна држава Косово, на оној дел од територијата на Србија, кој е под воена контрола на НАТО. До ова незапаметено беззаконие дојде поради деструктивната, суровата и неморалната политика на сила, што ја спроведуваат САД, изјави Коштуница.
- Со овој чин целиот свет дозна дека САД ја ставаат силата над Повелбата на Обединетите нации и оти се подготвени самоволно, безобѕирно и грубо да го нарушат меѓународниот поредок поради своите воени интереси.
Според Коштуница САД со примена на слепа сила ја натерале Европската унија да ги погази принципите врз кои и самата почива.
Тој оцени дека Европа денеска и „самата ја наведнала главата“, поради што ќе биде одговорна за сите далекусежни последици, „кои ова насилство ќе ги има врз европскот и светскиот поредок“.
- Претседателот на САД, кој е одговорен за ова насилство и неговите европски следбеници со црни букви ќе бидат впишани во историјата на Србија, но и во светската историја на меѓународното право, порача српскиот премиер.