Претседателот на Социјалистичката партија на Србија (СПС) Ивица Дачиќ изјави дека Србија треба да го повика Собранието на Република Српска (РС) да донесе одлука и да прогласи независност на РС, доколку независноста на Косово биде признаена без одлука на Советот за безбедност на ОН, јавија босанските медиуми.
- Зошто Косово би можело без одлука на Советот за безбедност да прогласи независност, а не може Република Српска, Јужна Осетија или Абхазија, изјави Дачиќ.
Тој смета дека меѓународната заедница и Русија мораат да гарантираат безбедност на Србите на Косово. - Доколку КФОР не може или не сака да ги заштити Србите (на Косово), доколку дојде до напади и инциденти ние сметаме дека тоа мора да го стори српската војска и полиција, изјави Дачиќ за медиумите во БиХ.