Белград, 9 септември (МИА) - Перо Давитковски (43) од Скопје е лицето кое ја прескокна бетонската ограда на куќата, во која живее Јованка Броз, сопруга на некогашниот претседател на СФРЈ Јосип Броз Тито, изјави српскиот министер за труд и социјална политика Расим Љајиќ.
Перо Давитковски тврди дека е син на покојниот Тито и Јованка и дека ја прескокнал оградата за да и се приближи и да добие „позитивна енергија“ од нејзе. Се претпоставува дека станува збор за нервно лабилна личност.
Кај Давитковски е пронајден пасош, од кој се гледа дека многу патувал кој помеѓу останатото бил и на аџилак во Ерусалим.
Љајиќ, кој ја посети вдовицата на Тито, рече дека Јованка Броз е добро и рекла дека ова не е прв пат некој да ја прескокнува оградата на куќата во која живее, а мотивите за тоа биле различни, некој прескокнувале од љубопитност, некој за да се слика со нејзе, а некој и само за да ја види.