Загреб, 6 октомври (МИА) - Односите меѓу Хрватска и Србија се во застој поради што не може да се организира ниту меѓудржавна средба на највисоко ниво ниту некој вид на реприза на регионален самит, изјави денеска хрватскиот претседател Стипе Месиќ на Брач.
Месиќ на меѓународната летна школа за демократија на тема „Дали е можен идентитет без омраза и нетрпеливост“ наведе дека утврдувањето на статусот на Косово што заврши со прогласување на самостојна држава бележи сериозен застој во процесот на нормализација и стабилизација на регионот, па дури и назадување.
- Незадоволството на Србија од признавањето на Косово почна да се прелева во Босна и Херцеговина и сериозно влијае на нејзината стабилност. Хрватска јасно се откажа од самата помисла дека има претензии кон било кој дел од БиХ. Хрватска јасно го дефинира и својот однос кон Хрватите во таа држава. Се уште чекаме слична порака од Белград упатена кон Србите во БиХ, но никако да ја дочекаме, наведе Месиќ.