Москва, 19 октомври (МИА) - Во решавањето на косовскиот проблем последен збор има Србија, изјави рускиот претседател Дмитриј Медведев во интервју за Вечерње новости.
- И покрај настојувањата на заштитниците на косовската независност, нема да им појде од рака да ја прикажат како неповратен процес, да го затворат тоа прашање. Сметаме дека треба чекор по чекор да се докажува дека постои алтернатива на правното самоволие.Никој не смее да тврди дека косовското прашање е решено, а Србија да не го кажала последниот збор, изјави тој.
- Русија учествува во решавање на косовското прашање според формула која одамна е усогласена со српските колеги - Белград да излезе со иницијативи, а ние доследно го поддржуваме. Со оглед на комплицираноста на проблемот, таквиот пристап се докажува како ефикасен, смета Медведев.
Тој ќе ја посети Србија на 20 октомври. При посетата ќе бидат разгледани и заеднички проекти во енергетиката.
- Претстојната посета на Белград е навистина важна за мене. Сметам на понатамошен напредок на меѓудржавната соработка и јакнење на братските врски меѓу нашите народи, потенцира Медведев во интервјуто за Вечерње новости.