Белград, 20 октомври (МИА) - Претседателот на Русија Дмитриј Медведев денеска ќе престојува во еднодневна посета на Србија во која со претседателот Борис Тадиќ ќе разгледаат можности за унапредување на соработката и ќе учествуваат во одбележување на 65 години од ослободувањето на Белград.
Станува збор за прва посета на руски претседател на Србија. Според планот за посетата, предвидени се разговори во четири очи со претседателот на Србија со кој потоа ќе присуствуваат на потпишување на низа договори.
Претседателот на Русија доаѓа да учествува и во одбележување на 65-годишнината од ослободувањето на Белград од фашистичкиот окупатор. По тој повод тој ќе присуствува на свечена академија.
Медведев ќе се обрати и во парламентот, а според неофицијални најави ќе има средба и со претставници на Синодот на Српската православна црква. Се очекува Медведев да соопшти одлука за одобрување кредит на Србија во износ од три милијарди евра.