Сараево, 21 октомври (МИА) - Разговорите на лидерите на политичките партии во БиХ со официјални претставници на САД и Европската унија продолжуваат денеска во Бутмир во близна на Сараево со очекување дека договор за уставни промени може да се постигне само со компромис.
Втората рунда во таа база на НАТО беше прекината вчера попладне меѓу останатото и затоа што премиерот на Република Српска Милорад Додик присуствуваше на 65-годишнината од ослободувањето на Белград.
Шведскиот министер за надворешни работи Карл Билт и заменикот американски државен секретар Џејмс Стајнберг оценија дека меѓу лидерите на политичките партии во БиХ постојат разлики и нема решенија преку ноќ.
- Постојат разлики, но има и движење напред. Никој нема илузии дека преку ноќ може да се реши тоа прашање во БиХ, изјави Билт изразувајќи уверување дека ќе биде постигнато компромисно решение.
Додик изјави дека на состанокот не станало збор за пакетот мерки кој им е понуден од САД и ЕУ, туку за „принципи и што може да се направи во овој момент“.