Брисел, 22 октомври (МИА) - Европратеничката Дорис Пак после неуспешниот состанок во Бутмир, изјави дека смета дека политичарите во БиХ воопшто не се заинтересирани да и помогнат на својата земја да стане демократска и целосно функционална држава.
Според зборовите на Пак, ни невладините организации не го одработиле својот дел од работата затоа што нивната улога е токму вршење притисок врз политичките претставници во таа земја, пренесува „Дојче Веле“.
- Да сум јас во позиција на босанските Хрвати, Срби или Бошњаци, би излегла на улица! Би барала од другите да тргнат со мене и така да им објаснат на политичарите во Мостар, Сараево, Бања Лука дека мораат да работат во интерес и за иднината на граѓаните. Вака политичарите можат и натаму да се чувствуваат моќни и да продолжат со своите запалливи говори, рече Пак.
После завршениот втор состанок во Бутмир, позициите во БиХ и понатаму не се променети, нема приближување, компромис и смирување, смета Пак.
Сепак, Пак во целата ситуација позитивно го оцени фактот што Меѓународната заедница и понатаму сака да ги продолжи разговорите, да понуди помош и некој вид платформа.
- Ако нема компромис во БиХ нема да има ни држава. Ако БиХ сака да влезе во ЕУ, таа може да влезе само како држава БиХ, а не поединечно, по ентитети, додаде Пак.