Лесковац, 24 ноември (МИА) - Српскиот претседател Борис Тадиќ синоќа изјави дека Србија никогаш нема да го признае договорот за демаркација на границата кој го потпишаа Македонија и Косово, додавајќи дека прашањето за зачувување на интегритетот на земјата директно е поврзано со демаркацијата на границата.
Тадиќ истакна дека неодамна со македонскиот претседател Ѓорге Иванов имал „многу сериозен разговор на оваа тема“.
- Многу јасно кажав дека Србија никогаш ни по која цена нема да го прифати демаркациониот договор на Македонија со т.н. држава Косово, нагласи српскиот претседател.
Тадиќ објасни дека и за Македонија во иднина е многу важна одлуката на Меѓународниот суд за правда за едностраното прогласување на независноста на Косово, која се очекува во следните месеци.