Тирана, 11 јануари (МИА) - Продолжува евакуацијата во Северна Албанија поради поројните дождови од кои реката Дрим поплави неколку реони, а нивото на водата во Скадар е над еден метар и го претвори реонот во езеро, објавуваат денеска весниците во Тирана.
Луѓето од тој регион се евакуираат со помош на армијата, и досега се евакуирано над четири илјади луѓе. Под вода се над два илјади куќи и речиси 10 хектари земја. Поплавена е и магистралата меѓу Скадар и Тирана.
Во спасувачките операции учествуваат единици на албанската армија, припадници на силите за безбедност на Косово и војници од НАТО.
Грција испратила група од 29 луѓе од силите за борба со елементарни непогоди и подготвува испраќање пратка со храна, лекови и вода за пиење.
Европската комисија соопшти дека ќе испрати експертска група за да помогне албанските власти да се справат со поплавите.
Премиерот Сали Бериша ги повика жителите на погодениот реони да ги напуштат домовите.
Лидерот на опозиционата Социјалистичка партија Еди Рама ја обвини Владата за „неспособност при справување со последиците“ и ги повика граѓаните и албанските емигранти да упатат финансиска помош за настраданите. Универзитетот во Тирана почна со собирање пари кои ќе бидат ставени на посебна сметка отворена на иницијативна на албанската Влада, наменети за луѓето во засегнатите региони.