Атина, 26 февруари (МИА) - Посредниот на ОН во македонско-грчките преговори за спорот околу името, Метју Нимиц денеска ќе престојува во Атина, откако пред два дена беше во посета на Македонија.
Ова ќе биде прв директен контакт на Нимиц со новата грчка Влада, која беше формирана по изборите во октомври минатата година.
Портпаролот на грчкото Министерство за надворешни работи Григoрис Делавекурас вчера изјави дека дека Грција очекува од Нимиц да ги чуе резултатите од неговата последна посета на Македонија и да му ги изнесе своите погледи за спорот.
Делавекурас повтори дека Атина се залага за решавање на спорот со усогласување на едно име за севкупна употреба, кое ќе вклучува „географска одредница“.
Нимиц завчера во Скопје по средбата со македонскиот премиер Никола Груевски изјави дека сега е вистинското време за да се реши прашањето за името, повторувајќи дека не донел никаков пишан документ.
- Како што знаете во изминатите години дадов многу предлози, од кои многу се уште се на маса и беа тема на разговор и би можело да бидат дел од решението. Делови од решението се добро познати, но сепак се уште нема целосно решение, подвлече Нимиц.