Белград, 17 март (МИА) - Известувачот на Европскиот парламент за Србија Јелко Кацин изјави денеска во Белград дека српските власти треба сами да решат дали да учествуваат во регионалната конференција во словенечкото одморалиште Брдо кај Крањ, но за Србија би било добро да се појави таму, објави електронското издание на „Блиц“.
- Новиот претседател на Европскиот совет Херман ван Ромпуј рече дека е подготвен да дојде во Брдо кај Крањ, ако таму дојде и српскиот претседател Борис Тадиќ. Сметам дека тоа е добра порака, рече Кацин по разговорите со претставници на парламентарните групи во српскиот Парламент.
Кацин истакна дека со учеството или отсуството од конференцијата Србија ќе покаже „дали е дел од решението или дел од проблемот“.
Европскиот парламент е подготвен да направи се што е неопходно и да и оддаде признание на Србија за се што постигнала, рече известувачот на ЕП.
- Ако Србија случајно денес или утре ја заврши соработката со Хаг, апсејќи ги останатите обвинети во Меѓународниот трибунал, ние сме во состојба да реагираме не во наредните седмици, туку во следните денови и да создадеме услови за одмрзнување на процесот и ратифицирање на Спогодбата за стабилизација и асоцијација, рече Кацин.