Брисел, 27 март (МИА) - Разговорите со македонскиот премиер Никола Груевски во Брисел минаа во позитивна атмосфера и покрај познатите позиции на двете страни, изјави грчкиот премиер Јоргос Папандреу, оценувајќи ја средбата како корисна за процесот за изнаоѓање решение за името.
- Разменивме мислења во позитивна атмосфера и покрај нашите позиции. Верувам дека ваквите контакти можат да имаат само позитивно влијание на напорите на ОН да се најде заедничко прифатливо решение за прашањето за името, рече Папандреу на прес-конференцијата на крајот од Самитот на ЕУ, без да изнесе повеќе детали од средбата.
Двајцата премиери се сретнаа во четвртокот во Брисел. И по третата тет-а-тет средба, како што изјави министерот за надворешни работи Антонио Милошоски, позициите на Македонија и на Грција за прашањето за името во најголем дела останале различни.