Анкара, 3 јуни 2010 (МИА) - Не може да се постигне мир во регионот ако се убиваат учесници во хуманитарни акции, изјави денеска турскиот премиер Реџеп Тајип Ердоган, коментирајќи го израелскиот напад врз меѓународниот конвој со хуманитарна помош за Газа.
- Убивањето на луѓе кои носат храна, лекови, градежни материјали, играчки и храна за деца нема да донесат мир и стабилност во регионот, изјави турскиот премиер.
Ваква агресивна политика нема да донесе никаква корист на ниту една држава, вклучувајќи го и Ирак и неговиот народ, предупреди Ердоган. Според него ниту една држава нема да постигне било какви позитивни резултати во областа на Газа, Ерусалим и Средоземното Море, со преземање на бандитски и пиратски акции во политиката.
Ердоган посебно нагласи, дека на бродовите со хуманитарна помош немало оружје, како претпоставувал Тел Авив. Израелското раководство направи историска грешка, оцени турскиот премиер. Тој додаде дека меѓународната заедница не треба да се смирува и дека треба да ја осуди примената на агресивна политика врз Палестинците од страна на Израел.
Турскиот премиер истакна дека акцијата на Израел против меѓународниот конвој не ги засега само интересите на Турција, туку и на уште 32 земји, од кои имало претставници во хуманитарната мисија.