Љубљана, 6 јуни 2010 (МИА) - Граѓаните на Словенија се поделени околу Арбитражниот договор за утврдување на границата со Хрватска, но сепак со тесно мнозинство го прифатија на денешното референдумско изјаснување, покажуваат првичните неофицијални резултати.
Словенечката радио-телевизија јави дека од преброени 719 илјади гласови, 51,49 отсто се за, а 48,51 против договорот. На гласање излегле околу 40 отсто од вкупно евидентираните 1,7 милиони Словенци со право на глас.
Премиерот Борут Пахор ги оцени резултатите од референдумот како „добри“ и изрази надеж дека со договорот конечно ќе затвори отвореното прашање со Хрватска, што ќе биде во корист на двете земји, но и на регионот.
Лидерот на опозицијата Јанез Јанша, пак, изјави дека резултатите ја покажале поделеноста на словенечката јавност околу договорот и ја повика Владата да не го занемарува тој факт.
Официјалните резултати од референдумот треба да бидат објавени на 14 јуни.
Словенија и Хрватска по 20-годишни несогласувања околу границата, во ноември лани постигнаа договор проблемот да го решаваат со меѓународна арбитража, но Љубљана реши прашањето да го стави на референдум. Словенија поради спорот околу границата привремено ја блокираше Хрватска во преговорите за членство во ЕУ.