Подгорица, 7 јуни 2010 (МИА) - Еврокомесарот за проширување Штефан Филе изјави дека борбата против организираниот криминал и корупцијата се заеднички предизвик за сите земји од регионот на Западен Балкан и за ЕУ и нагласи дека решението на овој проблем е еден од условите за влез во Унијата.
Филе додаде дека ЕУ од земјите кандидатки очекува прашањето за владеење на правото да го решат брзо, во процесот пред пристапувањето, „со цел подобро да се подготват за членството во Унијата“ и истакна дека Брисел е подготвен да пружи поголема поддршка за успех на тие напори, јавија црногорските медиуми.
Тој напомена дека напредокот на патот кон ЕУ посебно зависи од исполнувањето на политичките критериуми, а клучни предизвици се и јакнењето на функционирањето на институциите, посебно во однос на владеењето на правото, борбата против корупцијата и организираниот криминал, реформите во судството, екологијата и јакнењето на административните капацитети.
- Продолжување со економските реформи во тешкото меѓународно соседство, разновидноста на економијата и создавањето на човечки капитал и инфраструктурата се дополнителни предизвици, кои ќе помогнат во зајакнувањето на економската конкурентност. Не бараме брзи решенија и поправки, туку трајни решенија, нагласи еврокомесарот.
Филе додаде дека ЕУ ги цени напорите кои ги прават црногорските власти во борбата против организираниот криминал и оцени дека посебен предизвика за Црна Гора ќе биде подготовката за примена на законот за кривична постапка, по неговото стапување во сила во август.