Подгорица, 19 јули 2010 (МИА) - Потпретседателот на делегацијата на Европскиот парламент за односи со Југоисточна Европа Јелко Кацин смета дека доколку Македонија не постигне компромис со Грција околу спорот за името Црна Гора, по Исланд би можела да биде следниот кандидат за преговори со Европската унија.
- Доколку барем една земја преговара со ЕУ, тогаш тоа е поддршка за сите останати земји во регионот. Доколку Македонија нема да биде во состојба да се одлучи за компромис околу името, што би и овозможило да влезе во НАТО и да ги почне преговорите со ЕУ, тогаш секако Црна Гора е земјата која би можела да биде следниот кандидат за преговори, истакна Кацин за подгоричкиот весник „Вијести“.
Тој рече дека Црна Гора е мала земја, но додаде оти таа има двојно повеќе жители од Исланд и затоа, како што напомена, „штом може да преговара Исланд, најверојатно може и Црна Гора“.
Словенечкиот дипломат повтори дека Црна Гора исполнила важни предуслови во процесот на евроатлантската интеграција и оти тоа ја издвојува како потенцијален кандидат за преговори со ЕУ.
- Од сите земји од Западен Балкан, доколку ги издвојам на една страна Хрватска, а на друга Македонија, Црна Гора засега е единствената која го завршила процесот на ратификација на Спогодбата за стабилизација и асоцијација, па врз основа на тоа и го доби Прашалникот, додаде тој.
Кацин потсети дека Црна Гора почнала да одговара на Прашалникот и добила и втора серија дополнителни прашања, на кои одговорила и во моментов има трет пакет т.н. потпрашања со барање на специфични одговори. - Затоа според мене можам да кажам дека Црна Гора успешно и упорно напредува кон статусот на земја кандидат, порача Кацин.