Белград, 20 јули 2010 (МИА) - Србија е подготвена да поднесе во Генералното собрание на ОН „балансирана“ нацрт-резолуција за Косово по објавениот став в четврток на Меѓународниот суд во Хаг за легитимноста на прогласената независност на Косово, изјави денеска српскиот вицепремиер Божидар Ѓелиќ, кој е одговорен за евроинтеграции.
- Нацрт-резолуцијата ќе биде балансирана и ќе ја покаже желбата на нашата земја да се постигне компромис по сите прашања, вклучувајќи го и прашањето за статусот на Косово, истакна Ѓелиќ.
- Доколку за обновување на дијалогот Србија постави неприфатливи услови, тогаш тоа би значело уште на самиот почеток да се уништи можноста за дијалог. Првата етапа е да се воспостави дијалог. Сегашната ситуација не му оди во корист никому, додаде српскиот вицепремиер.
Тој уште еднаш повтори дека каква и да биде позицијата на Меѓународниот суд, Србија никогаш нема да ја признае независноста на Косово, која беше прогласена на 17 февруари 2008 година.
В четврток попладне Меѓународниот суд во Хаг треба да го соопшти својот став, кој ќе биде од консултативен карактер и нема да биде правно обврзувачки. По соопштувањето на позицијата ова прашање треба да биде разгледано во Генералното собрание на ОН.
Српската нацрт-резолуција најверојатно ќе биде повод за жестоки превирања меѓу приврзаниците и опонентите на независноста на Косово.