Белград, 28 јули 2010 (МИА) - Србија треба да ја прифати загубата на Косово и да преземе мерки за да го зачува северно Косово, каде мнозинството од населението се Срби, изјави премиерот на Република Српска, Милорад Додик.
- Белград треба да води сметка за тоа дека Косово е се помалку дел од Србија, нагласи Додик во интервју за весникот „Вечерње новости“.
Според Додик Белград сега треба да ги постави своите услови за да ја признае независноста на Косово.
- Доколку вие сакате, ние (Белград) да ја признаеме независноста на дел од Косово, ние сакаме тогаш северниот дел од покраината да остане во Србија, предложи премиерот на РС.
Меѓународниот суд на правдата минатата недела оцени дека прогласувањето на независноста на Косово не претставува нарушување на меѓународното право. Оваа оценка, иако нема обврзувачки карактер, сепак и нанесе удар на Србија, која сега планира да ги насочи напорите кон Генералното собрание на Обединетите нации во септември, за да ја оспори независноста на Косово.