Њујорк, 10 септември 2010 (МИА) - Генералното собрание на ОН вчера ја изгласа резолуцијата за Косово, поднесена од Србија и поддржана од ЕУ, јави Дојче Веле на македонски јазик.
Резолуцијата, што беше поднесена по повод одлуката на Меѓународниот суд на правдата за легалноста на еднострано прогласената независност на Косово, беше усвоена со акламација, без гласање.
Пред делегатите во Генералното собрание на ОН во Њујорк резолуцијата ја претстави српскиот министер за надворешни работи, Вук Јеремиќ. Тој нагласи дека таа е статусно неутрален документ, со кој се поздравува подготвеноста на ЕУ да го олесни дијалогот меѓу двете страни, во насока на подобрување на стабилноста и животот во регионот.
Српскиот шеф на дипломатијата уште еднаш нагласи дека Србија не ја признава едногласно прогласената независност на Косово.