Вашингтон, 9 октомври 2010 (МИА) - Иднината на сите балкански држави треба да биде во Европската унија, смета американскиот помошник-државен секретар Филип Гордон.
Коментарот на Гордон е во пресрет на посетата на американскиот државен секретар Хилари Клинтон на неколку балкански држави од 11 до 14 октомври. Таа ќе се сретне со лидерите на Босна и Херцеговина, Србија и Косово.
Клинтон ќе го посети и Брисел каде ќе учествува на средба на министрите за надворешни работи и на одбрана на земјите-членки на НАТО. Таа планира со европските лидери во Брисел да ги разгледа балканските проблеми.
Американскиот државен секретар пред европските претставници ќе ја претстави позицијата на САД дека патот кон членство во Европската унија треба да биде отворен за балканските држави.