Сараево, 12 октомври 2010 (МИА) - Американскиот државен секретар Хилари Клинтон денеска во Сараево ќе се сретне со членовите на актуелното Претседателството на Босна и Херцеговина, како и со новозибраниот член на ова тело Бакир Изетбеговиќ и со новиот претседател на Република Српска, Милорад Додик.
Помошникот државен секретар на САД за европски и евроазиски прашања Филип Гордон најави дека Клинтон ќе апелира за поблиска соработка меѓу српската, хрватската и муслиманската страна во Босна и Херцеговина, што, според него, ќе помогне за европска интеграција, „како единствената можна иднина на БиХ“.
По посетата на Сараево, Хилари Клинтон ќе отпатува за Белград каде ќе се сретне со српскиот претседател Борис Тадиќ, кој неодамна го најави почетокот на директните разговори меѓу Србија и Косово под покровителство на Европската унија.
- Единаесет години по војната во Косово и две години по прогласувањето на независноста на земјата, Клинтон ќе го изрази нетрпението на САД да го видат почетокот на дијалогот, во кој Вашингтон очекува активно да учествува, нагласи Гордон.
Клинтон ќе разговара и со српскиот премиер Мирко Цветковиќ, а ќе одржи средби и со министерот за надворешни работи Вук Јеремиќ и министерот за одбрана Драган Шутановац.
Според Вашингтон, Клинтон пред српското раководство ќе ја изрази силната поддршка на САД за процесот на европската интеграција на Србија.
Посетите на Сараево и Белград се дел од европската турнеја на Клинтон, во рамките на која таа во утре ќе ја посети Приштина, а во четврток ќе замине за Брисел.