Лондон, 14 октомври 2010 (МИА) - Духот на поранешниот водач на српските паравоени сили Аркан, се уште е жив меѓу „тврдокорните хулигани“ во Србија, пишува лондонски „Гардијан“.
Како што јави дописникот на МИА од Лондон, весникот забележува дека во рок од само два дена „српските разбојници“, на двапати и во два различни града Белград и Џенова, беа вклучени во нереди и насилство „комбинирано со талентот за организација и за политичка поддршка“.
Србија е позната по повеќемина свои спортски херои, но составен дел од животот на оваа балканска држава се и хулиганите и нивното насилство, што тврдокорните националистички политичари, господарите на војната и водачите на криминалното подземје, ги користат за своите цели, оценува весникот.
Лошото однесување на белградските млади не е изненадување, кога се знае големата невработеност во земјата, неизвесната иднина, дваесетгодишните воени судири и војни, крахот на државата, бомбардирањето на НАТО и криминализацијата на тамошното општество. Хулиганството во Србија, според весникот, сепак, секогаш е дел од политичките средства.
Навивачите на фудбалскиот клуб „Црвена звезда“ од Белград во изминатите две децении беа вклучени прво во разните паравоени српски единици, учествувајќи во војните во Хрватска и Босна и Херцеговина во операциите на етничко чистење. Во 2000 година тие меѓутоа се најдоа со народните маси во насилното соборување на режимот на Слободан Милошевиќ, за подоцна одново да се најдат заедно во уличните борби на тамошните неофашистички групи, свртувајќи се против Европската унија и САД, заклучува „Гардијан“.