Белград, 16 декември 2010 (МИА) - Претседателот на Србија Борис Тадиќ изјави дека е подготвен да разговара со косовскиот премиер Хашим Тачи за дијалогот меѓу Белград и Приштина, на кој инсистира ЕУ и покрај обвиненијата против Тачи содржани во извештајот на Советот на Европа.
- Мора да преговараме со секоја личност која косовските Албанци ќе ја избираат за свој легитимен претставник, нагласи Тадиќ.
Демократската партија на Косово на Тачи доби најголем број гласови на парламентарните избори, што се одржаа во неделата во Косово.
Два дена по изборите излезе извештајот на Дик Марти, од Советот на Европа, во кој косовскиот премиер се наведува како водач на група што се занимава со трговија со човечки органи, наркотици и оружје, од крајот на 90-тите години.
Тадиќ истакна дека обвиненијата треба да бидат ставени под истрага и дека меѓународната заедница треба да преземе соодветен однос по извештајот.