Хрватските власти почнаа да го запленуваат имотот на Санадер

Загреб, 27 декември 2010 (МИА) - Хрватските власти почнаа денеска во Загреб да го запленуваат имотот на поранешниот премиер Иво Санадер, на кого за уште еден месец му е продолжен притворот во Австрија.

Десетина судски извршители и полицајци влегоа изутрината во вилата на семејството Санадер во Загреб, од која привремено треба да одземат колекција од уметнички дела.

Жената на Санадер, Мирјана по едночасовното нејавување, сепак им отворила врата на извршителите и полицијата. Еден од членовите на адвокатскиот тим на Санадер, загрепскиот адвокат Иван Ловриќ изјави дека вратата на вилата се заглавила и најави жалба на судската одлука за привремено одземање на уметничките дела.

- Ќе се жалиме на таа одлука пред истражниот судија на загрепскиот Жупаниски суд, но и за се за што постои можност да се поднесе жалба, рече Ловриќ.

Привременото одземање на уметнички дела го одобри истражниот судија на барање на Канцеларијата за сузбивање на корупцијата и организираниот криминал, која пред десетина дена го блокираше имотот на Санадер и на неговото потесно семејство, меѓу останатотото и неколку банкарски сметки во Хрватска.

Уметничките дела ќе бидат привремено одеземени како гаранција дека државата ќе може да ги наплати побарувањата, доколку во судска постапка правосилно се докаже вината на Санадер.