Франкфурт, 27 јануари 2011 (МИА) - Специјалниот известувач на Советот на Европа Дик Марти изјави дека ЕУЛЕКС, каков што е денес, е немоќен да ја истражи трговијата со човечки органи и затоа треба да се создаде ад хок структура, која би била основана посебно за истрагата на овој случај и која ќе се наоѓа надвор од Косово.
Марти во интервју за франкфуртскиот весник „Вестима“ истакна дека постои опасност се да се заврши на поддршка на неговиот извештај.
- Потребно е да биде создадена една правосудна структура ад хок, основана посебно за истрагата на трговијата со органи, која би се наоѓала надвор од Косово и која ќе има право да применува мерки што ќе ги штитат сведоците и нивните семејства, не само за време на процесот туку и по него. Сведоците имаат толку многу работи да кажат, но стравуваат доколку биде откриен нивниот идентитет, додаде Марти.
- ЕУЛЕКС, онака како што е приморан да работи денес и како што е организиран, не верувам дека може да спроведе истрага на сериозен начин. Всушност, ако се погледнат државните судства и меѓународното правосудство во регионот, овие структури не биле способни да ги заштитат сведоците. Штом станува збор за процес на високо ниво или каде што се допира извесно ниво во криминалната хиерархија, констатираме дека сведочењата стануваат не само тешко изводливи туку и невозможни, нагласи известувачот на Советот на Европа.