Приштина, 15 февруари 2011 (МИА) - Еден од најбогатите Албанци во светот и лидер на Алијансата за ново Косово (АКР), Беџет Пацоли ќе биде новиот косовски претседател, реши Советот на Демократската партија на Косово (ПДК) на синоќешната седница на која е верификувана коалицијата меѓу двете партии.
Според коалицискиот договор, како што јави дописникот на МИА, АКР ја добива функцијата шеф на државата, додека ПДК местата премиер и претседател на Парламентот.
- Партискиот совет одлучи да влеземе во коалиција со АКР, со листата „Д-р Ибрахим Ругова“ и со партите на малцинствата. Сега останува оваа одлука да ја имплементира Претседателството на партијата, изјави доцна синоќа потпретседател на ПДК, Хајредин Кучи.
Пацоли, кој категорично инсистираше да биде претседател на земјата, затоа што, според него, на таа функција „може најмногу да придонесе за Косово“, со лидерот на ПДК, Хашим Тачи се договориле и за поделба на ресорите во идната влада.
ПДК во новата влада ќе го даде премиерот, еден вице-премиер и осум министри, а АКР добива едно вице-премиерско место и три министерски. Листата „Д-р Ибрахим Ругова“ ќе добие едно министерско место, српските партии добиваат три министерски ресори, a партиите на останатите малцинства ќе дадат два министри и еден вице-премиер.