Француската телевизија „Франс 24" откри таен извештај за трговијата со органи на територијата на Косово. Документот, доставен до ОН е од 2003 година, пет години пред Хашкиот трибунал за прв пат да спомене за тоа кривично дело.
Во 2008 година поранешниот главен обвинител на Меѓународниот трибунал за воени злосторства во Хаг Карла дел Понте за прв пат јавно призна за постоењето на трговијата со човечки органи на Косово.
Тајниот извештај од 2003 година е изготвен од страна на УНМИК - силите на ОН во Косово. Според експертите трговијата со органи започнала веднаш по завршувањето на војната - во 1999 и 2000-та година. Од документите станува јасно дека високи функционери на Ослободителната војска на Косово ги продавале органите главно надвор од територијата на Косово и Албанија.
Жртвите биле главно етнички Срби, но имало и млади девојки од Источна Европа. Тие биле префрлани илегално во тајни и приватни куќи во Албанија. Дел од жртвите биле жестоко мачени, а потоа нивните тела биле горени, јавува „Франс 24“.
Овој извештај не бил предаден на силите на ЕУЛЕКС, кои имаат обврска да испитаат сите злосторства извршени на територијата на поранешната српска покраина.