Приштина, 25 февруари 2011 (МИА) - Новоизбраниот косовски претседател Беџет Пацоли изјави дека има за цел да го направи Косово модерна мултиетничка држава.
- Сакам моите сограѓани да заборават на минатото и омразата кон Србите и да прифатат мултиетничност, изјави Пацоли во интервју за интернет страницата „Суисинфо“. Тоа е прво негово интервју по неговиот избор за претседател на Косово.
Без да зборува повеќе за историјата на конфликтот во Косово, Пацоли истакна дека во војната се извршени злосторства од двете страни и дека сака да го затвори тоа поглавје на воени злосторства.
Пацоли нагласи дека постојат многу пречки за да добие целосна доверба од жителите на Косово, но дека сепак ќе ги надмине.
- Сакам сонародниците да го заборават минатото и омразата кон Србите и да прифатат мултиетничност. Тоа ќе биде тешко, но ќе го постигнеме во соработка со премиерот и владата, изјави новиот претседател на Косово.