Белград, 19 април 2011 (МИА) - Министрите за надворешни работи на Србија и Русија, Вук Јеремиќ и Сергеј Лавров денеска во Белград изразија согласност дека односите на двете земји се пријателски, блиски и во нагорна линија, што ќе биде потврдено и со потпишувањето на договорот за стратешко партнерство.
Овој договор ќе биде потпишан за време на посетата на српскиот претседател Борис Тадиќ на Москва, која се очекува во блиска иднина, а до крајот на годината е планирана и средба на премиерите Владимир Путин и Мирко Цветковиќ.
По средбата во Министерството за надворешни работи, Јеремиќ односите на Србија и Русија ги означи како сеопфатни, содржински и во нагорна линија.
- Тоа е однос на заемно пријателство и недвосмислена меѓусебна поддршка, која со ништо не е условена. Заснована е на разбирање, а таква поддршка на меѓународната сцена може да се добие само од најдобрите пријатели. Србија и Русија денес се најдобри пријатели, истакна Јеремиќ.
Според српскиот министер за надворешни работи, голем дел од разговорите бил посветен на економската соработка, а особено на енергетиката.
Главен приоритет има проектот „Јужен поток“, но и новите проекти во областа на фармацијата и инфрастуктурата, за што Цветковиќ детално ќе разговара со Путин во Москва, нагласи Јеремиќ.
Во областа на културата, за оваа година во Москва е предвидено да се одржи Ден на српската култура во Русија, а Русија ќе помогне во сликањето на храмот на Свети Сава.
Лавров најави изработка на нова програма за соработка во областа на културата, науката, образованието и спортот во период од четири години.