Белград, 20 април 2011 (МИА) - Српскиот министер за надворешни работи Вук Јеремиќ му испратил писмо на генералниот секретар на ОН Бан Ки-мун со предлог на Србија во врска со истрагата на тврдењата во извештајот за нелегална трговија со човечки органи на Косово на известувачот на Советот на Европа Дик Марти.
Јеремиќ го испратил писмото по разговорот со рускиот министер за надворешни работи Сергеј Лавров за идните чекори кои треба да се преземат во врска со ова прашање.
Шефовите на дипломатиите на Србија и Русија вчера повикаа на објективна и непристрасна истрага под покровителство на ОН за тврдењата на Марти, оценувајќи дека за ова прашање не треба да се има двојни стандарди.
Според Јеремиќ потребна е доверлива меѓународна истрага под покровителство на ОН како поради територијалната јурисдикција на истражните органи, така и поради тоа што сите воени злосторства извршени на територијата на поранешна Југославија биле истражувани со мандат на Советот за безбедност на ОН.
Лавров изразил поддршка за иницијативата на Србија.