Атина, 20 мај 2011 (МИА) - Грција ја поддржа визната либерализација за државите од Западен Балкан и смета оти е неопходна заедничка работа за истата да се зачува, изјави денеска портпаролот на грчкото Министерство за надворешни работи Григорис Делавекурас.
Тој осврнувајќи се на можноста за повторно воведување на визниот режим за земјите од Западен Балкан наведе оти „Грција верува дека либерализацијата на визите за Западен Балкан е многу важен и позитивен чекор“, кој „им овозможува на луѓето точно да разберат каква е нивната перспектива и се потврдува фактот на припадност на европското семејство“.
- Од таа причина, Грција го поддржа укинувањето на визниот режим и продолжува да верува дека сите мораме да работиме за да ја зачуваме либерализацијата... Сите држави треба да преземат неопходни мерки и да ја применат стриктната контрола, специфичните процедури и предуслови, за да се избегне потенцијалната злоупотреба на азилантскиот режим во Европа, наведе Делавекурас.