Младиќ препознаен по прстенот што го носел на себе

Загреб, 27 мај 2011 (МИА) - Ратко Младиќ го идентификувал „поткажувач“ на полицијата врз основа на неговиот прстен, објави загрепски Јутарњи лист кој во својот извештај истакнува дека прв објавил вест за апсењето на Младиќ.

Весникот наведува дека БИА пред неколку месеци утврдила дека најбараниот хашки бегалец можно е да се наоѓа во околина на Зрењанин каде живеат негови роднини и за тоа го информирала претседателот Борис Тадиќ и специјалното обвинителство за воени злосторства на Србија. 

Таа информација Тадиќ ја пренел до хашкиот обвинител Серж Брамерц кој не бил задоволен и инсистирал на прецизно лоцирање и апсење на Младиќ, наведува весникот.

 Пресврт било кога до полицијата стигнала информација за Милорад Комадиќ како лице кое можно е да биде Ратко Младиќ.

Акцијата била брза и спроведена од специјалци а Младиќ во куќата бил со роднина, не давал отпор иако имал два пиштола со себе. Специјалците не наишле на никаков отпор, пишува Јутарњи лист додавајќи дека Младиќ рекол дека не сакал да ги убие „децата кои дошле да го апсат“. 

Според весникот, Младиќ во Лазарево бил забележан речиси случајно, неколку дена пред самото апсење, а го „предал“ прстенот со темен полудраг камен од кој не се одвојувал цело време на војната, па ни за време на воените злосторства во Сребреница. Прстенот го препознал полицискиот „информатор“ и го известил српското МВР.