Хаг, 3 јуни 2011 (МИА) - Поранешниот командант на босанските Срби Ратко Младиќ денеска првпат ќе се појави пред судиите на Меѓународниот трибунал за воени злосторства во поранешна Југославија.
На сослушувањето, закажано за 10 часот по српско време, судијата ќе побара Младиќ да го потврди својот идентитет и да одговори дали ги разбира 11-те обвиненија, покренати против него.
По 16 години поминати во бегство од меѓународното правосудство Младиќ беше уапсен во Србија на 26 мај и предаден на Трибуналот на 31 мај.
Обвинителниот акт против Младиќ беше променет неколку пати, за последен пат на 27 мај. Место по 15 точки во обвинението, тој ќе одговара за 11 точки за геноцид, злосторства против човештвото и нарушување на воените закони за време на конфликтот во Босна и Херцеговина од 1992 до 1995 година.
Меѓународниот трибунал за воени злосторства во поранешна Југославија го назначи Александар Алексиќ за службен адвокат на Младиќ за време на неговото прво појавување пред судот.