Атина, 22 јуни 2011 (МИА) - Грчкиот премиер Јоргос Папандреу ја доби довербата од парламентот со 155 гласови од вкупно 300 пратеници.
Сите 143 пратеници од опозицијата гласаа против, а двајца се воздржаа.
Откако не му беше изгласана недоверба, Папандреу изјави:Побарав доверба за да ги продолжам напорите за надминување на кризата и на дефицитот за избегнување крах и за поддршка на Грција во јадрото на еврото.
- Тоа гласање е договор со народот. Со него парламентот се ангажира да ги даде сите сили за излез од кризата. Имаме поддршка и помош од меѓународната заедница и од ЕУ кој ќе се изрази во голем заем, изјави тој.
До 30 јуни треба да биде прифатен силно непопуларниот пакет економски мерки кои предизвикаа голем број штрајкови низ државата и кој го намали рејтингот на Папандреу.
Новиот министер за финансии Евангелос Венизелос вети вчера дека парламентот до крајот на месецот ќе ги прифати мерките за заздравување на економијата што се услов за следната транша финансиска помош за Грција. Се очекува парламентот да гласа идната недела за буџетски намалувања од 28 милијарди евра и други економски ограничувања.