Брисел, 23 јуни 2011 (МИА) - Еврокомесарот за проширување Штефан Филе денеска изјави дека Србија треба да постигне напредок во правец на нормализирање на односите со Косово или да се соочи со ризик процесот на нејзиното приклучување кон ЕУ да биде блокиран од земјите членки на Унијата.
- Слушнав голем број коментари дека всушност никој не е подготвен да прифати нова членка која има отворено прашање во регионот со своите соседи. Јас сум еден од оние кои велат дека треба да се направат сериозни напори во процесот на проширување, со цел да се најде решение за ова прашање, истакна Филе по средбата со српскиот министер за надворешни работи Вук Јеремиќ во Брисел.
Шефот на српската дипломатија, пак, по разговорот нагласи дека признавањето на независноста на Косово нема да биде услов за членството на Србија во ЕУ.
Јеремиќ на прес-конференција го повтори ставот на Србија дека нема да ја признае независноста на Косово, односно дека овој став на земјата нема да се смени „во следните денови, недели, месеци, години, векови“.
Тој истовремено додаде дека „регионалната соработка ќе остане клучен приоритет за српската Влада“.
Филе и Јеремиќ се согласија дека целиот регион на Западен Балкан има европска перспектива и дека процесот на проширување треба да биде меѓусебно кредибилен, односно земјите од Западен Балкан треба кредибилно да ги исполнат условите, а членките на ЕУ треба на тој напредок адекватно да одговорат.