Брисел, 28 јули 2011 (МИА) - Високиот претставник на ЕУ за надворешна политика и безбедност Кетрин Ештон на српскиот претседател Борис Тадиќ и косовскиот премиер Хашим Тачи им ја пренела својата загриженост во врска со ситуацијата во северниот дел на Косово, укажувајќи им на значењето од обновување на дијалогот.
- Разговарав и со претседателот Тадиќ и со премиерот Тачи за да им ја пренесам својата загриженост и да ја истакнам нивната одговорност. Остро го осудувам насилството во Северно Косово и најновите случувања се неприфатливи. Сега од клучно значење е двете страни да се вратат на дијалогот и да ги решат основните прашања без одложување, се наведува во синоќешното соопштение на Ештон.
Таа истакна дека „одговорноста и на Белград и на Приштина е веднаш да ги смират тензиите и да ги вратат мирот и безбедноста за сите граѓани“.
Ештон додаде дека насилството никогаш нема да се толерира, а едностраните чекори не се начин за остварување напредок. Шефот на европската дипломатија ги поддржа напорите на ЕУЛЕКС и КФОР за смирување на ситуацијата во овој дел од земјата.